E à scjadenât scalfûr a Mueç la indagjin fate dai carabinîrs de stazion locâl, coordenade dal Sostitût procuradôr Giorgio Milillo, che e à puartât ae denunzie in stât di libertât di sîs personis, tra chês a son ancje nons de vecje aministrazion comunâl e ex dipendents. La acuse e je di “falsetât ideologjiche fate di public uficiâl in ats publics”.
La investigazion e je tacade dopo che a vevin tacât a rivâ brasilians che, su la fonde che a vevin gjenitôrs o nonos talians, a vevin otignude la citadinance taliane in maniere facile. Lis personis indagadis a varessin concedût la residence anagrafiche a 84 sogjets tra il 2018 e il 2024, simpri dentri di dôs cjasis dal paîs, ma inte realtât, chê int no veve mai vivût a Mueç. Cussì però a podevin finî l’iter par otignî la citadinance in pôcs mês invezit dai agns che a coventin se si vîf in Brasîl. A pene vude la citadinance, i brasilians a lavin a vivi in altris Paîs tal forest.
Daûr di chest trafic a son stâts cjatâts doi intermediaris, un albanês di 61 agns e un brasilian di 54 che a son a stâ in provincie di Vicence e che a furnivin ancje documents falâts cjapant fintremai a 6 mil euros par ogni pratiche. (a.d.g.) – 27.11.2025
