Le uniche robe buine de intese tra la Union Europeane e i Stâts Unîts sui dazis al 15% e je che, infin, e je stade fate une sielte, ma si trate di une sielte sbaliade.
A son lis peraulis une vore scletis di Luigino Pozzo, president di Confindustria Udine dopo che îr al è stât firmât l’acuardi tra il president dai Stâts Unîts Donald Trump e la presidente de Comission de Union Europeane Ursula Von der Leyen che al previôt dazis pe robe impuartade tal Paîs dal Nord Americhe e ancje une barcje di bêçs di spindi par impuartâ in Europe gas e armis. “Tal moment che si veve di fâ un pas indenant bande dal marcjât libar e su la fonde dal scambi libar – al à dit Pozzo – la Europe e à invezit fat bon une logjiche protezionistiche che e fâs dams in maniere pesante aes sôs impresis. La uniche sielete pussibil – razionâl, che cjalave indenant, coerent cui principis dal cumierç internazionâl – al jere un dazi è par a zero. Cualsisei altre soluzion e rapresente un cediment e un erôr strategjic”.
“In cheste situazion – al vise Pozzo – la Union Europeane e à il dovê di intervignî daurman cun misuris compensativis. O domandin che aes impresis europeanis ativis sul marcjât american a sedin ricognossûts ristôrs par almancul al 10% dal lôr faturât intai Usa. Chest al è l’unic mût par evitâ che chest erôr negoziâl al meti a risi dute la filiere de manifature”. (a.d.g.) – 28.07.2025
