“Vonde furlan a scuele!” Ducj cuintri Menia

No son plasudis cuasi a nissun lis peraulis di Roberto Menia, senatôr triestin di Fratelli d’Italia, elet in Ligurie. “Il talian al è la lenghe uficiâl de Republiche. Ducj i citadins a àn il dovê di cognossile e il dirit di doprâle”. Chestis lis peraulis, cu la propueste di modifiche al articul 12 de Costituzion: intal dissen di leç, la idee di meti in maniere uficiâl la lenghe taliane intal test costituzionâl. Par ce che al inten lis lenghis minoritariis, tuteladis de Costituzion, Menia al sarès contrari al insegnament inte scuele de marilenghe. “A son une vore i lûcs par fevelâ furlan, par esempli a cjase”. Lis reazions negativis a son rivadis sedi dai partîts di oposizion che de sô bande politiche. “Nissun al à di tocjâ il furlan!” al è il struc de declarazion dal coordenadôr regjonâl de Leghe, Marco Dreosto. (A.I.) – 29.11.2022