“La stagjon estive e à dât otims risultâts, fintremai superiôrs aes spietis. Jessi rivâts, cundut des consecuencis de pandemie, a passâ i numars de stagjon record dal 2019, pal turisim regjonâl al è dal sigûr confuartant, soredut par cjalâ in prospetive al futûr. Il Friûl Vignesie Julie al conferme e al rinfuarce, cun di plui, il so atrat in particolâr pal turisim di cualitât. Lu fâs in graciis di invistiments impuartants su la promozion e sui grancj avigniments, che si son pandûts strategjics par riclamâ la atenzion dai turiscj e favorî il slungjament de stagjon, cemût che a confermin i dâts tancj positîfs di Setembar”.
Lu à dit il governadôr dal Friûl Vignesie Julie Massimiliano Fedriga presint adun cul assessôr aes Ativitats produtivis Sergio Emidio Bini dilunc de presentazion dai dâts turistics de stagjon estive, che e à regjistrât numars positîfs pal compart. “Confrontant il periodi Mai-Avost dal 2022 cun chel dal 2019, lis presincis in Regjon a son cressudis dal 2,3% e lis rivadis dal 0,8% – al à dit Fedriga -. In particolâr a son stâts regjistrâts auments des presincis par Lignan (+3,2%), Triest (+13,3%), Gurize (+11,1%), Plan dal Cjaval (+18,6%), Pordenon (+8,7%), cuntune situazion plui o mancul analighe pes rivadis. La stagjon e je partide daurman ben cuntun aument des presincis dal 12,8% a Mai, par dopo passâ a un +4,6% a Jugn, al +1,9% di Lui fin a patî un câl lizêr a Avost (-1,6%), intant che par ce che al tocje Setembar lis proiezions a fasin presuponi risultâts otims cuntune cressite dal 15%, che al à ricjadudis economichis impuartantis pal Friûl Vignesie Julie”. (ADG) – 17.10.2022
