Une delegazion di agricultôrs si incuintrarà cul assessôr regjonâl Zannier

E continue la mobilitazion dai agricultôrs furlans aderents al Comitât vuidât di Massimo Lauzzana, che a àn protestât ai 29 di Zenâr passâts, puartant in Zardin Grant a Udin une setantine di tratôrs. “Inte matinade di joibe ai 8 di Fevrâr – al à anunziât Lauzzana – si cjatarìn inte sede de Regjon a Udin cul assessôr regjonâl aes Risorsis agroalimentârs Stefano Zannier, che al à dit di volênus scoltâ, e che i volìn esponi lis problematichis che i agricultôrs furlans a àn di frontâ, no dome a nivel european, ma ancje regjonâl. La delegazion e sarà vuidade di me e componude di altris cinc agricultôrs dal comitât. No puartarìn devant de Regjon nissun tratôr – al à anticipât Lauzzana – parcè che prin di dut no volìn causâ discomuts ae citadinance, ma ancje parcè che o volìn esprimi a clâr che no sin dacuardi cu la proteste organizade propit devant de sede de Regjon a Udin sabide passade, une manifestazion che cun chê no vin nuie a ce fâ”. (a.d.g.) – 06.02.2024