Des sieltis che la Europe e fâs tal cjamp de agriculture nol dipent dome il doman dai nestris contadins, ma ancje il rispiet des tradizions e, soredut, la salût dai citadins. Al è par dut chest che l’impegn de europarlamentarie furlane Elena Lizzi, dal grup Lega Identità e Democrazia, a Strasburc e a Bruxelles al è simpri stât fuart intal so lavôr te Comission Agricule (AGRI). Un lavôr che al va indenant parcè che a son diviers i dossier che a àn ancjemò di sierâsi.
Cu la cuistion des Indicazions Gjeografichis a son in zûc 75 miliarts di euros: cussì tant a costin lis produzions copiadis tal forest de Union Europeane.
“In Comission – e conte Lizzi – o vin votât a pro de propueste di un gnûf Regolament su lis Indicazions Gjeografichis che e je une robe une vore impuartante de Italie, jessint il Paîs european che al à plui prodots di bevi e di mangjâ ricognossûts de Union. Cun chest Regolament o vin voie di poiâ la cualitât e difindile dai nemîs ator pal Mont”.
La bataie in Comission no je stade lizere. La discussion e je stade grivie cuant che si son frontâts doi argoments une vore imberdeâts: ce che e à di fâ la Agjenzie pe proprietât dal intelet (Euipo) e cemût che bisugne gjestî il setôr dal vin.
“Il nestri grup Lega Identità e Democrazia – e dîs ancjemò Lizzi – al à cirût di no dâ masse deleghis al Euipo e fermâ il risi che lis Indicazions Gjeografichis a deventassin no plui di marchis di cumierç. In plui, jessint nô une vore dongje di chei che a produsin vin, o vin bataiât parcè che lis regulis plui impuartantis a restedin dentri la Politiche agricule comune (Pac), cussì di podê difindi miôr ce che al è tipic e podê gjestî lis cjartis in maniere plui svelte.
O vin dimostrât cun dut chest e ancjemò une volte che la Lega e je dongje dai contadins, di dut il setôr dal mangjâ e dal bevi e dai citadins che a comprin e a àn voie di savê ce che a mangjin”.
(Informazion par cure dal grup “Identità e democrazia – Lega Salvini Premier”) – 19.01.2024
