“E je une gnove impuartante oportunitât par disvilupâ il teritori de nestre regjon midiant progjets culturâi leâts ae rigjenerazion di lûcs abandonâts o dismetûts, ma in dut câs sugjestîfs, par spazis destinâts a miorâ la cualitât de vite dai citadins dal Friûl-Vignesie Julie, za tra lis primis in Italie: il strument al è un bant regjonâl cuntune disponibilitât finanziarie impuartante, cuasi 6 milions di euros. La propueste, che e destine ai progjets singui une cifre cjapade dentri tra i 100 mil e i 200 mil euros, e dopre ancje fonts comunitaris. Al va visât, a chest fin, che la nestre e je la Regjon taliane che e à plui capacitât di spese pes risorsis metudis a disposizion de Union Europeane e che la culture e rapresente un strument di ecelence par vivi miôr”.
Lu à sotlineât il vicegovernadôr e assessôr ae Culture dal Friûl-Vignesie Julie, Mario Anzil, che vuê a buinore al è intervignût, intal auditorium Antonio Comelli, inte sede di Udin de Regjon, a “Infoday, bando PrFesr, tipologjie di intervent D6.1.1”. La matinade di aprofondiment e je stade promovude de Regjon sul teme dai “incentîfs pal disvilup di progjets indreçâts a valorizâ il rûl che i museus, lis colezions artistichis-culturâls e altris prodots culturâi a puedin fâ tant che atôrs dal disvilup locâl – Sovenzions par progjets di rigjenerazion e riativazion di lûcs e spazis culturâi publics e privâts”. (a.d.g.) – 22.01.2024
