Un document firmât vuê di matine dai sindics di Gurize, Triest, Udin, Pordenon, Cividât e Monfalcon dentri dal municipi gurizan, al è stât mandât ai ministris dal Interni Matteo Piantedosi e de Economie Giancarlo Giorgetti, al president de Regjon Massimiliano Fedriga e ai presidents de Anci taliane e regjonâl, Gaetano Manfredi e Dorino Favot.
Il document al rivuarde la gjestion dai minôrs forescj no compagnâts: dentri trê domandis une vore claris, come sotlineât dal sindic di Gurize Rodolfo ZIberna: “Ducj i sindics – al à visât Ziberna – cence distinzion, a visin di un probleme che nol pues jessi scjamât su la schene dai Comuns. La situazion pes cassis dai municipis no je sostignibile dal pont di viste finanziari daspò che e je saltade fûr la mancjance dai bêçs dai Ministeris pal rimbors des spesis paiadis dai Comuns. Par di plui no je secondarie la dificoltât de gjestion dei minôrs par vie de mancjance di comunitâts disponibilis. Par chest o domandìn che nus vegni rimborsât ce che o vin za paiât e il trasferiment de competence pai minôrs, intes mans des prefeturis, come che za al sucêt pai adults. Par finî o domandìn la istituzion di dôs taulis tecnichis, une nazionâl e une regjonâl”. (a.d.g.) – 19.09.2025
