Salvadis lis fameis dal eco-strabalç

da Alessandro Di Giusto

La Europe e cambie la diretive su lis “Cjasis Verdis” cjapant la strade dal sintiment dit de Lega Salvini Premier. Al Parlament european in merit ae diretive su lis “Cjasis Verdis” (Energy Performance of Building Directive) e à vinçût il bon sintiment, ven a stâi la linie politiche dite de Lega Salvini Premier e dal grup Identità e Democrazia. L’acuardi vignût fûr dal ultin Trilogo al permet di parâ vie il risi che lis gnovis regulis a deventassin une eco-tasse patrimoniâl. Un risi soredut pe Italie, dulà che il grues des cjasis e dai palaçs a son stâts fats dai agns ’60 a agns ’80, cuant che lis tecnichis e i materiâi no jerin inovatîfs come cumò par sparagnâ calôr e curint.

“Nô si sin simpri dits cuintri di regulis che a podevin fâ dal mâl a lis fameis e al lôr sparagn – e conte la europarlamentâr furlane Elena Lizzi -. Cemût che e jere nassude la diretive, e podeve dome puartâ a coscj che i citadins no podevin frontâ, un marcjât de edilizie drogât, come che o vin za viodût cul Superbonus, e une pierdite di valôr des cjasis che no si rivavin a comedà. Ducj a pierdevin e di sigûr nol vinceve l’ambient, che invezit nô o vin interès a difindi cul bon sintiment cence sfuarçâ come che cualchi estremist vert in Europe al volarès”.

In struc, l’acuardi al dîs che lis cjalderiis che a doprin combustibii fossii, come il gas, a saran vietadis dal 2040, cinc agns dopo di chel che si voleve cul prin test de diretive, ven a stâi il 2035. In plui, no si oblearà plui a meti par fuarce i panei solârs sui tets des cjasis, ma al restarà dome par chês gnovis, pai palaçs publics dal 2026 e par chei no di residence dal 2030.

“O sin a pro di une ecologjie inteligjente – e continue Lizzi – che e pontedi a une neutralitât pal clime cence fâ dams ae economie e ai interès dai citadins europeans. Une ecologjie, ven a stâi, che e permetedi di puartâ in miôr la lôr vite, taiant lis boletis e puartant indenant lis impresis, cence nissun eco-strabalç”.

(Informazion par cure dal grup “Identità e democrazia – Lega Salvini Premier”) – 19.12.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui