Al torne il seren tra i rapresentants sindicâi de Polizie locâl di Udin dal Sapol e la Aministrazion comunâl, in graciis de mediazion dal prefet di Udin Domenico Lione.
Vuê di matine in prefeture e je rivade la fumade blancje daspò dal incuintri par cirî di tornâ a vierzi il dialic che si jere blocât cu la proclamazion di un siopar ai 21 di Setembar, in concomitance cu la Maratonina.
“Dutis lis parts – al à sotlineât il prefet Lione – a àn a cûr lis esigjencis di sigurece dai agjents di Polizie locâl e al sarès un pecjât blocâsi dilunc un percors za inviât, a discapit dal personâl e ancje de popolazion. Ve chi parcè che i rapresentants sindicâi e il Comun a àn condividût la decision di tornâ a inviâ il dialic par frontâ cuistions che si puedin dal sigûr risolvi”.
Dilunc de riunion lis parts a àn sclarît e concuardât il metodi di lavôr par lâ indenant in maniere costrutive. A son cussì stadis fissadis lis datis par tornâ a fa partî la taule tecniche che e sarà inte sale riunions dal comant de Polizie locâl ai 17 di Setembar aes 2 e mieze dopomisdì e ai 19 di Setembar aes 3 dopomisdì. (a.d.g.) – 12.09.2025
