Si pensave che, une volte rivade la fibre otiche, il colegament a Internet al sarès lât simpri ben e invezit a son problemis.
La conseire regjonâl dal Patto-Civica Simona Liguori e à presentât une interogazion ae Zonte regjonâl par segnalâ lis “numerosis criticitâts cjatadis dai utents dal Friûl Vignesie Julie che a doprin la rêt di fibre otiche”.
“La fibre otiche – e vise Liguori – e varès di garantî colegaments stabii e che a corin, ma masse citadins a segnalin un sbassament improvîs de cualitât e latencis anomalis. Chest probleme nol à a ce fa cuntun sôl operadôr e al bat cetantis zonis de regjon”.
Pe Liguori chest disservizi al pues vê un impat une vore pesant su la vite di ogni dì. “Al sarès un paradòs che, daspò dai fuarts invistiments fats pe bade ultra largje, la int no puedi fa afidament suntun servizi stabil”.
Inte interogazion si domande ae Regjon di ativâsi daurman e vierzi un confront cun Open Fiber e cui operadôrs comerciâi par sclarî ce che al sta sucedint e garantî un servizi adeguât ai citadins”. (a.d.g.) – 28.08.2025
