Al è scuintri politic su la ipotesi di privatizazion dai puarts prospetade dal Ministri dai Afârs Forescj, Antonio Tajani, îr in ocasion dal Meeting di Rimini di Comunione e Liberazione. “Par cjatâ plui fonts pal belanç dal Stât – al à dit Tajani – o pensi aes privatizazions, no de aghe, ma par esempli dai puarts”.
“Lis peraulis di Tajani su la privatizazion dai puarts talians a son faladis e danosis – e à dit la deputade Debora Serracchiani, responsabile per Justizie dal Pd e firmatarie de risoluzion su la portualitât presentade dal Partît democratic in Comission Traspuarts ae Cjamare -. Pensâ di fâ casse svendint struturis strategjichis nazionâls al è segn di confusion. Lis Autoritâts di sisteme portuâl a funzionin, ma il public al à di dâ direzions unitariis di politiche maritime”.
“O domandìn al president Fedriga di cjapâ daurman une posizion nete cuintri cualsisedi ipotesi di privatizazion dai sistemis di autoritât portuâl, e di mandâle al ministri dai Traspuarts”, al à afermât la segretarie dal Pd provinciâl di Triest e componente de Direzion nazionâl Caterina Conti.
“Ancje Forza Italia dal Friûl-Vignesie Julie, traviers i siei vertiçs regjonâi e la delegazion al Guvier – e à zontât Conti – e declare daurman di no jessi dacuardi cu lis propuestis dal vice prin ministri Tajani. O vin di tignî in sigurece la autonomie dai puarts talians a scomençâ di chel di Triest, esempli di buine gjestion publiche”. (a.d.g.) – 25.08.23
