La publicazion di un articul dal cuotidian La Verità indulà che si fasin domandis su cemût che al è stât fat il contrat pal conciert fat a Glemone dal cjantant Andrea Boccelli, pe ocasion dai 50 agns dal taramot, al sta tirant su un polvaron di chei fuarts. Ancje parcè che chel conciert al è costât ai contribuents dal Friûl Vignesie Julie plui o mancul trê milions di euros. Cualchidun al fevele di fûc amì, parcè che dal sigûr chest cuotidian al è di simpri inschiriât a pro dal Centridrete e, di solit, simpri une vore critic soredut cun esponents politics dal Centriçampe.
“Il president Massimiliano Fedriga – e à dit Caterina Conti, segretarie regjonâl dal Pd – al sclarissi a la svelte lis gnovis che a stan lant ator su cierts aspiets incuietants sul conciert pal cincuantesim dal taramot che al è stât fat ai 7 di mai passât. In spiete di savê di plui, ancje dai ats eventuâi di sindicât ispetîf, o cjapin at che la nature e i mûts di pandi cheste gnove a mostrin mal sta une vore fuart dentri dal centridrete. La figure dal president Fedriga no somee bastâ plui par cuvierzi lis divisions profondis e insanabilis che lu stan cjapant dentri”.
L’assessôr Riccardi al à confermât il fat che a sedin rapuarts professionâi di so fi cun cui al à lavorat tal concierts, ma al lasse fûr cualsisedi colegament cu l’event: “La lôr societât no je stade cjapade dentri – al à dit Riccardi, che al dinee ancje de vê vût un so rûl tal afidâ il conciert – e nol è coret dî che jo o afidi. Jo no ai afidât propit un biel nuie”. (a.d.g.) – 31.08.2026
