Ae fin di une zornade lungje tal Friûl Vignesie Julie, îr sore sere il ministri Matteo Piantedosi al à firmât a Triest, adun cul Governadôr Massimiliano Fedriga, la Anci Fvg e lis prefeturis di Udin, Triest, Pordenon e Gurize , un protocol di intese pe promozion de sigurece integrade.
Il protocol al ponte a fâ deventâ plui valevule la azion sul teritori, cuntune vore di atenzion pal coordenament des Fuarcis di Polizie e chês de Polizie locâl, pes gnovis tecnologjiis pal video control, pe prevenzion dai fenomens criminâi plui frecuents e pe tutele de cualitât de vite intes areis urbanis.
Par confermâ il so impegn, la Regjon e met a disposizion vot milions di euros. Un prin toc, cuatri milions, al larà aes Prefeturis (un milion par ognidune) par comprâ imprescj e par intervents straordenaris a pro des Fuarcis di Polizie. Altri cuatri milions a saran risiervâts ai Comuns par rindi plui fuarts i sistemis di video control e miorâ la conession tra lis salis operativis. (a.d.g.) – 23.09.2025
