Piantedosi a Gurize pe gnove cuesture: i minôrs forescj no compagnâts a restaran su lis spalis dai Comuns

E reste pal confin dal Friûl-Vignesie Julie la sospension de Convenzion di Schengen che e à dât risultâts bogns. Lu à dit il ministri dal Interni Matteo Piantedosi, presint vuê a Gurize pe inaugurazion de gnove cuesture adun cul cjâf de Polizie Vittorio Pisani.

Piantedosi al à ancje sotlineât che no saran fats sù altris Cpr (centris di permanence e rimpatri) e che dal sigûr nol sarà il Stât – come che a vevin domandât intune letare ducj i sindics des citâts plui grandis de regjon – a stâ daûr de gjestion dai minôrs forescj no compagnâts, che e sta dant cetancj problemis, ancje se almancul a rivaran i bêçs anticipâts dai municipis e che a metin sot sore lis cassis comunâls. (a.d.g.) – 22.09.2025