In curt la Regjon e larà indenant cuntune gnove amission intes graduatoriis des domandis di finanziament previodûts pe edilizie agjevolade. A saran doprâts i 45 milions di euros stanziâts intal ultin assestament di belanç che a cuvierzaran lis domandis presentadis fin ae fin dal 2021.
Lu à dite cheste matine l’assessôr regjonâl aes Infrastruturis e Teritori Graziano Pizzimenti. “Dentri dal esercizi finanziari corint – al à precisât l’assessôr ilustrant il Plan anuâl 2022 pes politichis abitativis, aprovât a maiorance in IV Comission consiliâr – si procedarà dopo cuntun altri scoriment des graduatoriis doprant i 30 milions assegnâts cu la leç di belanç 2022-2024. Cussì o podarin dâ rispueste a dutis lis domandis presentadis dentri dal Avost di chest an”.
Cun di plui, cun altris stanziaments, che la Zonte regjonâl e previôt di assegnâ cul assestament prossim e lis economiis par 75 milions “o podarin – al à afermât l’assessôr – finanziâ ancje lis domandis presentadis in daspò di chês rivadis ienfri chest an”.
Intai ultins mês, a pet de misure di intervent sul front de edilizie agjevolade, si è regjistrât un fuart aument des domandis, soredut de bande di cubiis zovinis. “Chest aument di domandis – al à sclarît l’esponent de Zonte regjonâl – al è daûr a produsi une spese plui alte a pet di chê preventivade in origjin. Si è decidût di fat di ricognossi ai zovins une maiorazion plui alte, passant dai 2.500 ai 4.500 euros. Par chest il cost complessîf anuâl di chest intervent al varès di jessi di 40 milions”. (ADG) – 5.10.2022
