I bêçs metûts a disposizion in chescj doi setôrs a son plui di 300 milions. La cifre le à dade l’assessôr regjonâl al Ambient Fabio Scoccimarro a margjin de aprovazion dal articul 4 dal dissen di leç di assestament dal belanç regjonâl e dai emendaments, che si è tignude vuê di matine tal Consei regjonâl, daspò che îr a jerin stâts presentâts i contignûts dal articul e i emendaments.
“Cun chest pachet di intervents metûts in cheste manovre di Istât – al à visât Scoccimarro – dal valôr di cuasi 103 milions,, l’impegn finanziari tal 2026 pes deleghis de Difese dal ambient, energjie e svilup sostignibil, al passe i 300 milions”. Par chest l’assessôr al à fevelât di un sfuarç fuart de Zonte regjonâl par garantî un Friûl Vignesie Julie simpri plui sigûr, eficient e sostignibil tant che la nestre regjon e je tra chês plui indenant pai risultâts vûts te transizion energjetiche. (a.d.g.) – 23.07.2026
