A coventin regulis claris e no dome protocoi cuant che si trate di intervents di socors public. A domandâlu il Conapo, sindicat dai Vigjii dal fûc dopo di une schirie di fats indulà che la gjestion no je stade simpri eficient.
L’ultin câs il socors di un adolessent in Val Rosandre, cuant che si son movûts tal stes timp doi elicotars, chel dai Vigjii dal fûc e chel regjonâl. “Di continui – al à dit Damjen Nacini, segretari regjonâl dal Conapo e il so vice Cristian Busolini – intervents che a son di competence dai Vigjii dal fûc a son trasferîts al elisocors regjonâl o aes scuadris di une organizazion di volontariât. Ma chest al va cuintri ancje di ce che al è previodût dal Dissiplinâr tecnic operatîf dal Nue 112. Ogni volte che al va su un elicotar sanitari la spese regjonâl e cres e intant al reste a tiere un elicotar dai Vigjii za pront, fat a pueste pal socors tecnic e za paiât dal contribuent”.
Ve chi parcè che il sindicat al à scrit al President dal Consei Giorgia Meloni, al ministri dal Interni Matteo Piantedosi e al sot segretari di Stât Emanuele Prisco parcè che a intervegnin daurman a pro de tutele des competencis dal Stât. Il Conapo dal Fvg al à ancje domandât che i cjâfs talians dai Vigjii dal fûc a metin un elicotar inte nestre regjon, cence scugnî dipendi di chel di Vignesie. (a.d.g.) -22.07.2025
