Lis polemichis a vadin indenant di setemanis, cun acusis incrosadis e declarazions duris tra il Comun di Udin e la Regjon. Vuê dal Comun di Udin al è rivât un apel gnûf ae colaborazion istituzionâl sul câs dai finanziaments al Teatro Nuovo Giovanni da Udine. Il sindic Alberto Felice D Toni e l’assessôr ae Culture Federico Pirone a àn decidût di spostâ la atenzion dal confront politic ae necessitât di garantî risorsis siguris al plui impuartant pôl culturâl de regjon.
“Cui che al à sbassât i finanziaments e je stade la Regjon e si trate di une robe che no si pues capî parcè che a son leçs finanziariis une vore sioris – al à dit il sindic, che al à ancje rispuindût aes acusis fatis al municipi -. Contà che il Comun di Udin al è inutil o che al vedi une zonte incompetent, mi somee un sproposit e no intint fami strissinâ su chest teren parcè che o vin a ce fa cuntun atac personâl e no cuntun confront politic”.
De Toni al à mandadis indaûr ancje lis critichis su cemût che a vegnin doprâts i fonts regjonâi, visant che i 20 milions che a son stâts dâts par slargjâ il Carnera a son fers “No par colpe dal Comun, ma parcè che no vin ancjemò ricevût nissun progjet. (a.d.g.) – 24.06.2026
