Il Dipartiment de Publiche sigurece al à dineât “la presince di servizis di intelligence forescj a Udin, pe ocasion de partide di balon Italie -Israêl”. La gnove che a saressin stâts ancje i agjents israelians dal Mossad e jere stade pandude de Gazzetta dello Sport, scjadenant une fuarte polemiche politiche, tant che ancje la conseire regjonâl di Avs Serena Pellegrino e veve scrit che si tratave di une sielte inconcepibil.
Il cuotidian sportîf al veve scrit che il ministri dal Interni Matteo Piantedosi al sarès stât in contat cu lis autoritâts di Tel Aviv par garantî un acet seren ae scuadre israeliane che e jere controlade sul nestri teritori di une patulie di agjents dal Mossad, ma al è daurman rivâ di Rome il dinei su cheste presince. (a.d.g.) – 07.10.2025
