“I citadins che a doprin stuis o cjaminets par riscjaldâ lis abitazions a puedin stâ cuiets: de bande de Regjon no saran limitazions al lôr ûs. Chê saltade fûr su chest argoment rivuart dal Plan regjonâl su la cualitât dal aiar e je une polemiche sterile e strumentâl, che no fâs altri che dâ pinsîrs dibant ae int”.
Lu à dit il governadôr dal Friûl-Vignesie Julie Massimiliano Fedriga gjavant vie ogni dubi su la pussibilitât di doprâ cjaminets e stuis inte nestre regjon. “Cui che al dopre i lens par scjaldâ la abitazion nol à di preocupâsi – al à dit Fedriga -, al podarà continuâ a fâlu e al è assurt ancje dome pensâ che la Regjon e puedi imponi misuris che a lassaressin al frêt i citadins, in particolâr inte aree di mont”. (A.D.G.) – 21.12.2022
