E fâs discuti il mancjât finanziament dal Ministeri de Culture al documentari diret di Simone Manetti, dedicât a Giulio Regeni, il ricercjadôr furlan copât intal 2016 in Egjit.
A pontâ il dêt cuintri de esclusion de pelicule a son stâts no dome une vore di citadins che sui Social a fevelin di un scandul, ma ancje une vore di conseîrs regjonâi, tacant di Nicola Conficoni dal Pd che al à scrit: “La vicende tragjiche di Giulio Regeni e je pardabon di interès culturâl e civîl pal nestri Paîs e pal Friûl Vignesie Julie.- Cu la sielete cence justificazion di no dâ un jutori a une opare za premiade che e sarà mostrade ancje tal Parlament european e in cetantis Universitâts, il Ministeri al à tirât un scufiot in muse a ducj chei che si son dâts di fâ in difese dai dirits umans.
Une vore dure ancje le critiche de conseire regjonâl Serena Pellegrino di Alleanza Verdi e Sinistra: “La mancjade concession di contribûts publics al film su Regeni al è un fat grâf e che al dâ pinsîr. Al è un bavai suntune des pagjinis plui dolorosis e ancjemò no risoltis de nestre storie resint”.
“O palesi dut il gno sconciert e o condani, tant che Open Sinistra Fvg – al à scrit il conseîr regjonâl Furio Honsell – il mancjât ricognossiment dai fonts dal Ministeri al documentari su lis ultimis tragjichis oris di Giulio Regeni e i tentatîfs di ostacolâ la ricercje de veretât e ancje il disinterès di figuris impuartantis dal mont economic talian, preocupât di no vuastâ i rapuarts comerciâi cul Egjit”. (a.d.g.) – 07.04.2026
