L’onorevul Aldo Gabriele Renzulli si è studât vuê inte cliniche Mediche de Aziende sanitarie universitarie Friûl centrâl, dulà che al jere ricoverât di cualchi dì. Al veve 80 agns. Dilunc de sô lungje cariere politiche, Renzulli – laureât in Filosofie e dirigjent di aziende – al è stât esponent di ponte dal Psi in regjon, rivant a jessi elet deputât par doi mandâts tra il 1987 e il 1994. Di là di conseîr regjonâl, al è stât nomenât vicepresident de Regjon e assessôr regjonâl ae Sanitât.
Tancj i messaçs di corot, tacant di chel dal president de Regjon Massimiliano Fedriga: “A non de Aministrazion regjonâl si strenzìn ai familiârs di Gabriele Renzulli, un om che al à savût interpretâ cun passion e competence il so impegn politic intes istituzions nazionâls e locâls, lassant in ereditât chel leam profont che al à vût simpri cul teritori”.
Cussì il president dal Consei regjonâl Mauro Bordin al à ricuardât Renzulli: “Un om di grant valôr, coerent fin al ultin cu lis sôs ideis, vêr servidôr des istituzions intai diviers rûi che al à cuviert intal cors de sô lungje cariere politiche”. Messaçs di corot a son rivâts ancje di Massimo Moretuzzo, Furio Honsell, Diego Moretti e Debora Serracchiani. (Foto: Gabriele Renzulli a çampe cun Ferruccio Saro). (A.D.G.) – 15.05.2023
