Associazions e partîts dal centri çampe doman, aes dôs dopomisdì, a laran a Gardiscje (centri di permanence e rimpatri) tacant di place Unità e in corteu fintremai devant dal Cpr, par domandâ che la struture a sedi sierade dopo i problemis e des violencis che a son sucedûts intai ultins timps.
Contrari ae sierade invezit il Sap (Sindacato autonomo Polizia) che, par bocje dal so segretari regjonâl Lorenzo Tamaro al vise che “Il Cpr al è une struture indispensabil par podê mandâ a cjase cui che al è jentrât in Italie in maniere ilegâl e nol va sierât. Nol baste plui – al à scrit Tamaro – meti a puest il Cpr i maniere provisorie pai dams fats des rivoltis continuis. Al covente un nivel di sigurece bon di garantî ai operadôrs des Fuarcis dal ordin, che a lavorin dentri, di podê davuelzi lis lôr funzions ridusint il plui pussibil i risis pe lôr incolumitât”. (a.d.g.) – 16.05.2025
