“Trop a varano di spietâ ancjemò i furlans par viodi ricognossûts i lôr dirits ae informazion radiofoniche e televisive inte lôr lenghe?”. Cussì, intune note, il cjâf grup dal Pat pe Autonomie Massimo Moretuzzo dopo la discussion de interogazion che e domandave al assessôr competent un inzornament su la convenzion tra Presidence dal Consei dai ministris e Rai pe trasmission di programs radiotelevisîfs in lenghe furlane, scjadude a fin Otubar.
“La cuistion de presince e ûs de lenghe furlane inte programazion radio e tv de concessionarie dal servizi public radiotelevisîf e je simpri vierte. Tantis domandis a son delududis. O domandìn, par esempli, parcè che no sedi mai stade creade ancjemò une struture autonome dedicade ae radio e ae television in lenghe furlane a Udin, formade di personâl competent a garanzie de cualitât dal servizi ufiert, e cemût che a sedin stâts spindûts i fonts publics – cressûts a pet des convenzions precedentis – pe programazion radiotelevisive de concessionarie dal servizi public radiotelevisîf là che ancjemò no son contemplâts i spietâts notiziaris informatîfs radiofonics e televisîfs in lenghe furlane”. (ADG) – 11.11.2022
