Il Consei regjonâl al à aprovât, dome cui vôts de maiorance e la jessude de aule di Patto per l’autonomia Civica Fvg e Partito democratico, la mozion dal cjâf grup de liste Fedriga, Mauro Di Bert, indulà che si invide la Zonte a legjiferâ cun misuris e vincui sui parcs fotovoltaics a tiere di grandis dimensions, duncje di là dal megawatt, in spiete che il Guvier al mandi fûr i decrets atuatîfs sul probleme.
La Regjon intal 2021 e veve aprovât une leç, ma e jere stade refudade de bande de Cort Costituzionâl. Di Bert al à sclarît che l’obietîf al è evitâ di sacrificâ etars preseâts di teren, ma “o vin di promovi ogni azion buine pal disvilup traviers il miôr belançament des esigjencis economichis e sociâls, cu la tutele dal ambient, dal paisaç, dal teritori, de agriculture”. (a.d.g.) – 21.02.2024
