La Cort costituzionâl e à ritignût incostituzionâl la leç regjonâl su la assegnazion des cjasis Ater. Sot acuse il cjapitul relatîf ae assegnazion dai lozaments a citadins extracomunitaris, che ur è domandât un certificât che al testemoni la mancjance di proprietât di imobii intal lôr Paîs di origjin. Chest document invezit nol è domandât a cui che al ven di Paîs comunitaris, e nancje tant mancul ai talians.
La leç regjonâl sul teme e je datade 2016, Zonte Serracchiani, ma il cjapitul censurât al è stât zontât intal 2018, cuant che a vuidâ la Regjon e jere za la prime Zonte Fedriga.
Su la vicende a son stâts impegnâts i tribunâi, cun desenis di ricors vinçûts di citadins extracomunitaris, cjapade dentri ancje une sentence dal tribunâl di Udin, dal 2021, che al ordenave di cambiâ il regolament in materie. Intant che il document al rivave in Cort Costituzionâl, la Regjon e veve cambiât la norme, previodint la pussibilitât di rimplaçâ i documents, dificii di cjatâ, cuntune autocertificazion semplice, parificant di fat la situazion a chê gjenerâl. “Par Fedriga ogni ocasion e je buine par tibiâ imigrâts o cui che al ven a lavorâ in Friûl-Vignesie Julie” al è l’atac dal Partito Democratico par vôs di Salvatore Spitaleri. “Il risultât al è une figurate istituzionâl, e soredut la decjadence lungje e inesorabile de nestre regjon” al conclût il component de comission paritetiche “simpri plui feralut di code dal Nord Est.” (a.d.g.) – 13.02.2024
