No si cuiete il scuintri tra la Regjon e il Comun di Udin su la cuistion dai tais regjonâi pal Teatro Nuovo. Vuê il vice president de Zonte regjonâl Mario Anzil, dilunc de presentazion dal bant gnûf a pro dai teritoris par contâ identitât e memorie, ae domande di un gjornalist di Telefriuli al à tirat une gnove stocade cuintri de Zonte comunâl vuidade di Alberto Felice De Toni, acusade di jessi imobil e di no doprâ i milions di euros che la Regjon e à za mandât.
“O pensi che i aministradôrs di Udin – al à dit Anzil – a varessin di impegnâsi di plui a pro dai lôr citadins invezit di cirî visibilitât buine dome pai apontaments eletorâi che a rivaran. Pluitost di lamentâsi in maniere false de mancjance di trasferiments de Regjon, a varessin di pensâ a cemût spindi lis desenis di milions za rivâts sui conts dal Comun e fers par vie de lôr inerzie. I bêçs che o vin mandât pal Teatro Nuovo a son dome 79 mil euros in mancul a pet dal an passat, cuant che al jere stât il record storic dai trasferiments. La petizion a pro dal teatri e je stade fate su la fonde di dâts fals: no je vere che la Regjon e à taiat i trasferiments di 250 mil euros. Il vêr tai – al à sotlineât Anzil – al è stât fat cuant che al jere sindic Honsell, tant che i bêçs dal Comun a jerin passâts di 900 mil a 500 mil euros”. (a.d.g.) – 22.06.2026
