De Regjon poie aes universitâts e ai students meritevui

Cul assestament di belanç la Regjon e garantirà 15 milions di euros in dut aes dôs universitâts regjonâls, che cussì a podaran partecipâ ai bants ministeriâi dal valôr di 100 milions di euros. E je une azion impuartante parcè che se no lis universitâts dal Friûl Vignesie Julie a podevin jessi esclududis dai bants. Lu à dit l’assessôr regjonâl al Lavôr, formazion, istruzion, ricercje, universitât e famee Alessia Rosolen dilunc dal so intervent in Seste comission consiliâr che e à dât parê favorevul.

A son stâts stanziâts ancje 2 milions di euros par garantî i assegns integratîfs pal dirit al studi universitari a ducj i sogjets meritevui. (A.D.G.) – 09.07.2022