Cussì i miedis in pension a tornaran a vore

Vuê il Consei regjonâl al à aprovât il dissen di leç 72 che al torne a vierzi fintremai dai 31 di Dicembar dal 2026 la pussibilitât di incarghis di lavôr autonom par miedis che a son za in pension.

La disposizion e previôt di introdusi struments straordenaris par frontâ la emergjence de mancjance di miedis di medisine gjenerâl, permetint ai professioniscj che a son in pension di lâ indenant cu la lôr ativitât. Il dissen di leç al è coordenât cuntun emendament dal Guvier talian par ridusi i efiets fiscai e previdenziâi par cui che al continuarà a meti su il cjamiç blanc. (a.d.g.) – 02.02.2026