Culture in regjon: numars in incressite

Il 2025 si è sierât cuntun sucès mai viodût prime pe ERPAC, la Agjenzie regjonâl pal patrimoni culturâl: in dut, 226.671 jentradis tai lûcs de culture in regjon, plui dal dopli a pet dai numars dal 2024 e dal 2023. Un risultât sburtât des mostris une vore popolârs come “Confini”, Confins di Gauguin, che al tire dongje cuasi 700 visitadôrs ogni dì e a ‘nd à puartâts plui o mancul 100.000 a Vile Manin. Ma ancje in gracie da cressite esponenziâl di Gurize, che e je cressude di 23.000 a plui di 93.000 jentradis. “Cheste incressite record, imbinade cuntune fuarte presince internazionâl dai visitadôrs di Slovenie, Austrie e Gjermanie in particolâr – al à comentât Mario Anzil, vice governadôr dal Friûl-Vignesie julie cun deleghe ae culture, fevelant a Udin te presentazion dai dâts dal ERPAC – , e conferme la capacitât dal nestri model di jessi in dialic cu la Europe e no dome.” Tal 2026, l’Ent al previôt un program che al va des arts visivis ae fotografie, consolidant il model de “gnove culture di frontiere”. Dongje des mostris za viertis a Gurize e a Triest, e chês che a rivaran – par esempli “Ruota libera” (Ruede libare) a Vile Manin, dedicade ae evoluzion sociâl de Italie viodude de bande de biciclete, il calendari al sarà inricjît de gnove viertidure dal Museu de Mode (ai 17 di Avrîl) e di cualchi grant conciert. (A.I.) – 30.03.2026