Di là dal siopar gjenerâl proclamât de Cgil par dute la zornade di doman, vinars ai 3 di Otubar, a son stadis inmaneadis inte nestre regjon cuatri manifestazions. La mobilitazion e je stade decidude dal sindicât par difindi la mission umanitarie Flotilla, che e je stade blocade dai israelians intant che e stave lant bande Gaza.
“L’intervent cuintri des nâfs civîls al è stât fat cence nissun rispiet pal dirit internazionâl” al à declarât Michele Piga, segretari regjonâl de Cgil, che al critiche il Guvier Meloni par vê bandonât lavoradôrs e volontaris.
Il corteu plui impuartant al sarà fat doman di matine a Triest, indulà che di flanc de Cgil e saran ancje la Union dai universitaris e la Rêt dai students medis.
A Pordenon le manifestazion e tacarà aes 9.30 in place XX Settembre, a Monfalcon des 10 aes 12 in place Repubblica e a Udin al sarà fat un presidi in vie Pracchiuso, sot de Prefeture tacant des 11. (a.d.g.) – 02.10.2025
