Contribûts pai albiercs difondûts de Regjon Fvj

Vie libare de Zonte regjonâl ai fonts a pro de ristruturazion e dal inmodernament di unitâts imobiliârs. Intal proviodiment – ilustrât inte riunion dal Esecutîf regjonâl dal assessôr aes Ativitâts produtivis e al Turisim Giorgio Emidio Bini – si previôt di concedi contribûts a pro dai proprietaris dai imobii par un totâl che al va da dîs mil fin a vincj mil euros par ogni unitât imobiliâr. Ogni singul beneficiari al podarà presentâ domande di contribût par un massim di cuatri unitâts imobiliârs. Simpri secont il gnûf regolament lis unitâts abitativis, une volte ristruturadis, a varan di jessi dadis in gjestion a albiercs difondûts par dîs agns. (A.D.G.) – 26.08.2022