Colaborazion tra Polizie di Stât e Regjon tant avantazose

Il governadôr dal Friûl-Vignesie Julie Massimiliano Fedriga, a margjin de cerimonie dal 171m Aniversari de Fondazion de Polizie di Stât ospitade dal Teatri Verdi di Triest, al à sotlineât che “La grande aleance tra istituzions e continue a dâ risultâts positîfs su dut il nestri teritori. Si che duncje o sin onorâts intal lâ indevant inte colaborazion strente e avantazose cu la Polizie intal ambit des competencis dadis ae Regjon. Une azion di supuart costant, ancje cun contribûts di caratar economic, a pro des Cuesturis dal Friûl-Vignesie Julie. In particolâr o pensìn aes strumentazions inovativis di contrast ae criminalitât acuisidis cui fonts regjonâi”. Il governadôr al à tabaiât ancje dal stât di emergjence deliberât dal Guvier par frontâ la cuistion migrants. “Al è un strument par garantî une rispueste plui svelte a une situazion in efiets alarmante – al à marcât Fedriga -. I numars des personis che a rivin, soredut dal Nord de Afriche, a son impressionants, cussì cemût che a son in cressite a pet dal an passât chei che a rivuardin la rote balcaniche. Par cjatâ une soluzion al covente dut câs un intervent de Union europeane cuntun coinvolziment fuart dai Paîs interessâts in maniere direte dai flus migratoris. Par ce che al tocje in particolâr il Friûl-Vignesie Julie – al à concludût il governadôr – si augurìn un infuartiment dai acuardis cu la Slovenie par ce che al tocje lis riamissions”. (A.D.G.) – 12.04.2023