Di cinc agns, Elena Lizzi (Lega-Identità e Democrazia) e je impegnade tal Parlament European inte difese dai interès dai citadins e dai piçui imprenditôrs. E à fat un grues lavôr di studi e di propueste dulà che si decidin lis leçs, convinte che fâ al è plui impuartant che someâ.
Di cuâl risultât ise plui braurose?
“Chel di vê puartât plui imprescj par difindi il nestri mangjâ, cuintri soredut il fals Made in Italy. Par esempli, o soi rivade a meti intal Regolament pes Indicazions Gjeografichis i articui juscj par no viodi plui ator nons simiotâts come chel dal Prosec. La Europe e à sedi di sigurâ ce che al rive tal plat dai siei citadins, sedi di dâ cuintri ai piratis dal mangjâ e al Italian Sounding che a robin a lis nestris aziendis passe 100 miliarts di euros par an”.
Parcè ise cuintri dal Green Deal?
“I obietîfs a puedin plasê, ma la ideologjie des çampis e à puartât a viodi dome il jessi sostignibil viers la nature, dismenteant di lâ ancje viers la economie e la comunitât. E cussì, a fuarce di eco mateçs, la cure e sarà piês dal mâl”.
Ce intindie?
“Cjapait l’esempli des Cjasis Green e dal diviêt pai motôrs tradizionâi pes machinis: dut il cost dal passaç energjetic al è discjariât su lis fameis. E par intant a dut il rest dal Mont no i free nuie”.
E je dopo la cuistion dai imigrâts…
“Bisugne dividi la imigrazion dai disperâts che a vegnin molzûts dai marcjadants di oms, de imigrazion invezit economiche che e à di jessi seletive e lâ secont un program. La Europe fin cumò no à frontat il probleme in maniere serie, lassant di bessôi i Paîs dulà che i forescj a rivin, soredut la Italie. E ancje il Pat di pôc proponût de Comission Von der Leyen no nus puarte di nissune bande”.
E à volût fâ cognossi a Bruxelles Gnove Gurize e Gurize Capitâl Europeane de Culture dal 2025, parcè?
“Fin di cuant che si son proponudis, o ai sostignût i organizadôrs di Go!2025. Gurize, come ancje Strasburc, al è simbul des tragjediis dal Nûfcent e o crôt che inte citât furlane e podedi vê sede une istituzion de Ue, ancje une par tirâ plui dongje i Balcans”.
Nus conte di une sô sperance?
“La Europe e à di deventâ pardabon la cjase di ducj i siei citadins. Par chest o ai lavorât une vore su la Cjarte europeane de disabilitât e par chest o ai compagnât tal Parlament personis di chenti come Marisol Calligaro, Maria Chiara Coco e Stephanie Zilli Bellisario che a àn fat viodi la lôr fuarce ancje se a àn malatiis une vore pesantis. Il lôr plasê pe vite e je une lezion par ducj nô”.
(Informazion par cure dal grup “Identità e democrazia – Lega Salvini Premier”) – 22.04.2024
