Al à fat un gnûf pas indenant il percors dal emendament proponût daspò dal câs di Preon, indulà che il sindic e il coordenadôr dal grup comunâl di protezion civîl a jerin stâts condanâts par omicidi colpôs daspò de muart dal volontari Giuseppe De Paoli, copât di un arbul intant che al lavorave dopo un burlaç.
Vuê di matine, la comission Afârs costituzionâi dal Senât e à finît la votazion sui emendaments al dissen di leç in materie di protezion civîl, proponût dal ministri Nello Musumeci che al à dât la gnove.
“Cu la aprovazion dal emendament su la responsabilitât penâl par colpe – al à spleât Musumeci – o fasin un pas indenant par adeguâ il cuadri normatîf aes realtâts operativis de protezion civîl. Al ven di fat metût dentri un regjim speciâl che, tal rispiet des garanziis previodudis dal ordenament, al ricognòs la specificitât dai intervents di emergjence e al da plui ciertece a volontaris, autoritâts e operadôrs che a son clamâts par intervignî in situazions di complessitât straordenarie”. (a.d.g.) – 16.07.2026
