Il president dal Consei regjonâl dal F-Vj, Mauro Bordin, al è stât nomenât vuê a Florence membri suplent de rapresentance des Assembleis legjislativis talianis dentri al Comitât european des Regjons. La nomine e je rivade intal cors de assemblee plenarie de Conference taliane dai presidents di Regjons e Provinciis autonomis, inmaneade intal salon dal Consei regjonâl de Toscane.
“Cun chest gnove incarghe – al à comentât Bordin, che al à dit graciis ai coleghis presidents pe fiducie – o cirarai di puartâ in Europe lis istancis e lis tematichis cjaris al Friûl-Vignesie Julie. Une regjon caraterizade di une lidrisade tradizion mitteleuropeane e di une multiculturalitât e un multilinguisim che di simpri a àn acompagnât la cressite e il disvilup”. (a.d.g.) – 22.02.2024
