Bordin e la Arlef: “La lenghe patrimoni di ducj”

La lenghe furlane tant che un ben preseât di prudelâ. I risultâts dal grant impegn dai insegnants tes scuelis, par trasmeti lis cognossincis di fonde a fruts e fantats. La frontiere, critiche, des gnovis tecnologjiis. E par finî, ma salacor plui impuartants di dut, i numars. Ven a stâi lis 440 mil personis che in regjon a son usadis a fevelâ par furlan, zontadis a chês altris 300 mil che in ogni câs lu capissin. A son cetantis lis tematichis frontadis tal cors dal incuintri istituzionâl cordiâl fra il president dal Consei Regjonâl, Mauro Bordin, e i vertiçs de ARLeF. Te sede de Agjenzie regjonâl pe lenghe furlane, in vie Prefeture a Udin, il president Eros Cisilino, adun cul diretôr William Cisilino, al à esponût al massim rapresentant de Assemblee legjislative i sucès e lis criticitâts de azion cuotidiane di promozion de lenghe.
Il president de ARLeF si è concentrât in particolâr su la colaborazion scomençade di pôc cu la associazion dai Udinese Club, sui progjets te aree gurizane e cividine, su la produzion dai dizionaris locâi che, dopo de prime esperience di Rigulât, si intint meti adun in maniere plui largje e organiche. Fra i progjets in evoluzion, a son une vore impuartants i invistiments tes gnovis tecnologjiis, come il ricognossiment vocâl che al permet di voltâ a la svelte par furlan ancje su Google, un imprest che il president Cisilino al vûl potenziâ e che par chest al à domandât la poie de Regjon par rivâ a meti adun une app che si puedi inzornâ in maniere plui direte e semplice, dal moment che nol è par nuie facil confrontâsi cui zigants dal web.
Il president de Aule al à domandât informazions in particolâr sul andament dai progjets scolastics, dulà che l’insegnament dal furlan si scuintre, nancje dîlu, cu lis dinamichis demografichis: simpri mancul fruts, e un numar simpri plui grant di arlêfs che a vegnin di altris regjons di Italie e dal mont. Dut câs, al reste simpri positîf il dât dal 70-80% di “sì” des fameis al insegnament dal furlan te scuele primarie. Dulà che i piçui arlêfs a puedin contâ, in gracie de poie de Regjon, suntun sussidiari in marilenghe fat une vore ben, che ae fin dal cicli di studi ur ven regalât.
“In chescj agns – al à comentât Bordin – a son stâts metûts in cjamp imprescj di promozion une vore impuartants, cun invistiments smirâts su scuele e gnovis tecnologjiis e cu la colaborazion cun altris realtâts dal teritori. L’obietîf, al è naturâl, al è chel di puartâ il furlan pardut, parcè che o sin cussients de impuartance de lenghe, un vêr patrimoni pe nestre identitât, di trasmeti aes gjenerazions che a vignaran”.
“L’impegn de ARLeF e de Regjon al è pardabon grant – al à zontât il president dal Consei regjonâl – ma al è clâr che tant al dipent di ce che al sucêt intes fameis: o vin di pensâ che il tiessût sociâl dal Friûl al è cambiât e duncje chest percors al è plui dificil che no tal passât. I numars che o ai viodût vuê a son dut câs confuartants, se o tignìn cont dai mudaments che si son verificâts te societât”.
Ancje la “classifiche” fra lis areis dulà che si fevele par furlan te provincie di Udin e à incuriosît Bordin. In chest moment o viodìn al prin puest la aree culinâr, denant dal Friûl centrâl e di dôs realtâts che in cualchi maniere a son antitetichis: “Te Basse Furlane – al à spiegât di fat Eros Cisilino – e je une buine predisposizion a fevelâ par furlan, ma lis cognossincis si puedin miorâ. In Cjargne e su lis monts furlanis invezit al è un nivel di cognossincis pardabon alt, ma il status de lenghe furlane nol è calcolât cemût che al meretarès”. (R.L.V.) – 17.09.2025