Vuê, la societât Fur Veicolo 2 Srl e à consegnât al ent regjonâl Ardis il gnûf studentât universitari dit Cjase Burghart, che a si cjate devant de stazion di Udin, in viâl Europa Unita 111.
“Lis residencis universitariis screadis vuê in Borc stazion a Udin – e a dit l’assessôr ae Universitât Alessia Rosolen – a testemonein la atenzion de Regjon bande i students meritevui e bisugnôs. Par cheste Aministrazion al è impuartant garantî il dirit al studi midiant l’ûs di fonts regjonâi e nazionâls. La gnove Cjase dal student, che e ospitarà no dome che i universitaris, ma ancje i arlêfs dal Istitût tecnic superiôr Malignani, e je dome un dai progjets dedicats ae Universitât di Udin, viodudis lis dificoltâts cjatades pal adeguament sismic dal complès di viâl Ungheria e l’aument relatîf dai coscj fin a 42 milions di euros. Ae lûs di chest, la ativazion di colaborazions ancje tra public e privât al pues rispuindi intal stes timp ae dibisugne di gnûfs lozaments pai students e a mantignî alte la cualitât dal sisteme universitari”.
L’edifici, di proprietât de societât Fur Veicolo 2 Srl, al è stât concedût a fit par dîs agns ae Agjenzie regjonâl pal dirit al studi (Ardis), che a sô volte e à vût dal Pnrr un contribût di 3,72 milions di euros a cuviertidure parziâl dal cost anuâl e dai coscj dai servizis di gjestion. (A.D.G.) 22.12.2022
