A Grau e ocôr une sede permanente dai pompîrs

da Alessandro Di Giusto

“E je aromai improrogabile la viertidure di une sede permanente des Vuardiis dal fûc te isule di Grau”. Lu declarin intune note Damjan Nacini e Claudio Ughi, in maniere rispetive segretari regjonâl e provinciâl dal Conapo (Sindicât autonom Vigjii dal Fûc). La Regjon Friûl-Vignesie Julie e à stanziât pal trieni prossim altris finanziaments che a garantiran però dome la viertidure stagjonâl di un presidi lassant che la isule, par gran part dal an, e sedi cuvierte de scuadre professioniste dai pompîrs di Monfalcon cun timps plui luncs par rispuindi aes domandis di socors. “O disìn graciis ae Regjon pes altris risorsis – a disin i sindicaliscj -, ma la dibisugne di vierzi daurman une sede permanente ative 365 dîs par an, 24 oris su 24, al è simpri plui atuâl, calcolât che di Monfalcon une scuadre e implee plui o mancul 30 minûts par rivâ te Isule, cence calcolâ dopo la eventuâl dibisugne dal ûs di mieçs nautics par prestâ socors dentri de lagune. E je rivade la ore – a concludin Nacini e Ughi – che dutis lis parts politichis regjonâls a domandin adun al Ministeri dal Interni la viertidure di une sede permanente di pompîrs a Grau. Ogni rimant al podarès jessi danôs pal socors ai gradesans”. (a.d.g.) – 30.11.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui