“Vê gjavât i cartei trilengâi de stazion di Cividât, azion fate di RFI, e je stade une azion une vore grave, fate cence nissun preavîs o confront cu la ARLeF, che di agns e à une funzion di promozion de lenghe furlane sul teritori. Gjavâ ce che za al esisteve al è un at che al va di là de negligjence tecniche: al è un at di dinei culturâl e istituzionâl cuintri une lenghe tutelade de Costituzion.” Cussì Eros Cisilino, president de ARLeF – Agjenzie regjonâl pe lenghe furlane, che al comente cun fermece ce che al è capitât.
“No je une gnove instalazion: chei cartei a jerin za. A son stâts gjavâts in maniere unilaterâl, cence interpelâ la ARLeF, cence rispiet pal teritori e pes comunitâts che a son a stâ sul puest. Un compuartament tant plui grâf se si calcole che RFI e je ben cussiente des lenghis minoritariis presintis sul teritori. Di fat, a son dentri, tant che altris ents che a operin in Friûl, inte rêt di monitorament de ARLeF pe metude in vore dal Plan gjenerâl di politiche linguistiche pe lenghe furlane, fat bon de Regjon Autonome Friûl-Vignesie Julie. A san ce che e je e dulà che e je la ARLeF, e ogni an a rispuindin aes ativitâts di monitorament, e propit di chest al risulte za che vie par une vore di agns no son rivâts a aplicâ nancje un cartel bilengâl. Cumò o sin al salt di cualitât in negatîf”.
“O volarès ancje ricuardâ che la ARLeF e à sotscrit un protocol di intese cu la FUC (Feroviis Udin Cividât), dimostrant cemût che la colaborazion istituzionâl e puedi esisti in maniere virtuose. Ma cun RFI, magari cussì no, o assistìn al contrari, ancje se no je une novitât, soredut cuant che o vin a ce fâ cui ents statâi. Di fat, chest al sucêt no dome cun RFI, ma ancje cun altris ents dal Stât, tant che la RAI nazionâl, al contrari de sede regjonâl, che cun chê invezit si colabore in maniere costrutive.”
“O tornìn a bati cun fuarce: l’articul 6 de Costituzion taliane al garantìs la tutele des minorancis linguistichis. Al è un principi superiôr di chê cjarte. E cuant che si ignorin chescj principis, si viole il pat democratic che al è la fonde dal nestri Stât.”
Par chest, la ARLeF e à indreçât une letare formâl al President de Republiche, Sergio Mattarella, par che si fasi garant de metude in vore efetive dai principis costituzionâi in materie di tutele linguistiche.
“La lenghe furlane – al siere Cisilino – no je un ornament e nancje une concession simboliche: e je part de identitât di cheste tiere ad in plen e e je tutelade de nestre Costituzion. O domandìn cun fuarce di meti fin a chescj compuartaments, che a ofindin no dome la dignitât dai furlans, ma la credibilitât des istituzions. O pretindìn rispiet. E no molarìn, cun determinazion, di fâ valê i dirits linguistics de nestre comunitât”. (a.d.g.) – 07.07.2025
