“La comunicazion Social de Arlef e je considerade tant che un model european: si trate di un atestât che nus jemple di sodisfazion e che e torne a paiâ di dutis lis fadiis fatis pe promozion de lenghe furlane midiant dai mieçs in linie. O vin considerade tant che strategjiche cheste sielte, sedi par ufrî un servizi di cualitât ai nestris coregjonâi, sedi par rivâ ai cetancj fîs di imigrâts che a fevelin furlan e che a son sparniçâts di ogni bande tal mont”.
Al è chest il coment dal assessôr regjonâl aes Autonomiis locâls cun deleghe aes Lenghis minoritariis Pierpaolo Roberti, daspò dal ricognossiment des plateformis social de Arlef tant che “model european”, te suaze dal progjet Crossterm, cofinanziât de Union europeane cul program Interreg Italie-Slovenie.
Il risultât al è stât otignût in graciis de cressite costant dai numars de Agjenzie tal mont dai social network tai ultins agns, ma ancje de capacitât di cjapâ dentri comunitâts digjitâls midiant il fat di doprâ in mût eficient i lengaçs contemporanis.
Dal 2020 a vuê, il profîl Instagram de Arlef al è passat di 4.850 a 15.435 follower, cuntune cressite dal 218%, intant che il profîl Tik Tok de Agjenzie, clamât “Tic e Tac Furlan”, in mancul di trê agns al è rivât a 20.500 follower e al gjenere in medie plui di 10 milions di impressions par an, doprant pirulis curtis di lenghe furlane. A chest si zonte YoupalTubo, il canâl Youtube nassût tal 2022 cun zovins autôrs che vuê al pues contâ su 140 videos, plui o mancul 18 mil iscrits e al rive dongje dal milion di visualizazions par an. (a.d.g.) – 26.06.2026
