L’incuinament des microplastichis inte aghe al è simpri di plui un probleme. I tocuts di plastiche, une vore di spes plui fins di un cjaveli, che nancje si viodin a voli, a vadin par dut e ae fin o sin a risi di tornâ a vêju dentri tal nestri cuarp. Par chest al è pardabon interessant il progjet pilote in Italie, finanziât de Regjon Friûl Vignesie Julie cun 150 mil euros e che al cjape dentri ancje i Comuns di Premariâs, Pavie e Cividât, inviât in chescj dîs de Aministrazion comunâl di Pradaman par blocâ lis fibris di plastiche puartadis vie de aghe scjamade de laveblancjarie, passe 700 mil si stime, ogni volte che si lave la robe.
Ai citadins al sarà dât a gratis un filtri bon di blocâ fintremai dal 90% des microplastichis che a rivin di une lavade: par aderî ae sperimentazion al tocje compilâ un modul jenfri dai 31 di Mai: a cjase al rivarà un pac cun dentri il filtri, lis cartucjis e lis istruzions par metilu sù. (a.d.g.) – 11.05.2026
