Di vuê di matine a son stadis impiadis lis telecjamaris di control tai sîs passaçs par jentrâ inte Zone a trafic limitât dal centri di Udin.
Come che e à spleât Rosi Toffano, assessôr ae Polizie locâl dal Comun di Udin, fintremai dai 13 di Lui cui che al jentre cence vê il permès temporani o permanent al sarà visât cuntune comunicazion che i rivarà a cjase, ma cence nissune multe. Dai 14 di Lui, invezit, cui che al passe cence vê un permès valit al sarà fotografat e la multe e rivarà drete a cjase.
Di la dai residents che a àn dirit al permès permanent, a puedin jentrâ i titulârs di un parc, agjents e rapresentants di cumierç, artesans e imprenditôrs che a vedin une ativitât dentri de Ztl (permès permanent) o che che a stan fasint lavôrs (permès temporani), miedis in visite cul cartelin metût in mostre dentri de auto, invalits, fuarcis dal ordin e altris categoriis segnadis intal regolament. (a.d.g.) – 13.04.2026
