Cumò une place tal non di Gianpietro Benedetti

Gianpietro Benedetti al à simpri puartât tal cûr la sô citât, dulà che tal Mai dal 1942 al è nassût (parochie dal Carmine) e al à studiât (Malignani) fin a jentrâ te Danieli di Buri e, fasint dentri une lungje cariere fin a cjapâ in man il tamon, le à puartade a deventâ une dite fuarte innomenade in dut il Mont. E a Udin, Benedetti al à volût simpri ben e cuant che al à podût le à judade a tignîsi di cont. Lui al à volût meti a puest place Libertât, il tor dal orloi (cu lis statuis dai moros), la fontane di place S. Jacum, il Cjiscjel… e cuant che une sô creature, l’Its Academy, e meretave di vê une cjase gnove e plui grande, al à volût curâ un cancar dentri tal centri de citât, la vecje fabriche de birarie Dormisch, lade a fûc vincj agns indaûr e bandonade.
Benedetti dai 28 di Avrîl dal 2024 nol è plui, ma la sô presince, in dite come in dut il Friûl, si sint ancjemò. Une memorie che e merete, cumò, di jessi fissade ancje intun puest de citât, che cussì e podarès intune maniere dîi graciis. Nomenant, par esempli, une vie, anzit ancjemò miôr une place. Propit chê devant di Cort Puarte Vilalte, dulà che si cjate l’Its Academy. Il Comun le à a pene metude a puest e al è un gnerf impuartant, dulà che ducj i dîs e passe cetante int e soredut zovins a miârs. Chest al sarès il puest miôr, simpri miôr che intune gnove vie fûr de citât, fintremai intune zone industriâl o intun borc di vilutis, come che al è sucedût a altris grancj furlans. Cumò la place e je nomenade a Giovan Battista Cavedalis… cui jerial chest? Al jere di Spilimberc, nassût tal 1794 e inzegnîr des feradis, che tal 1848 al à combatût pe Republiche di Vignesie. Par intitulâ un non di vie o di place la leç e oblee il Comun a spietâ almancul dîs agns, saldo che nol sedi un fuart motîf par fâlu daurman. La grandece di Benedetti e il so sium deventât cumò concret o crodìn che lu sedin. (R.C.) – 28.10.2025