E jere cetante int îr a Glemone pal decim prin radun dai alpins dal Bataion Glemone. Miârs di alpins, di dutis lis etâts e une vore dispès indenant cui agns, a son rivâts di dute Italie par memoreâ la formazion siolte 20 agns indaûr, ma restade tal cûr di tancj.
Dopo vê fat omaç a Franco Bertagnolli, president de Ana ai timps dal taramot, denant dal monument a lui dedicât e vê consegnât dai atestâts di socis onoraris ae associazion ‘Mai daûr’, il corteu al è lât inte caserme Goi Pantanali. Inte grande place dentri de caserme a son stâts fats i discors uficiâi – tantis lis autoritâts presintis e tra chei il sindic di Glemone Roberto Revelant e l’assessôr regjonâl Barbara Zilli, tancj aministradôrs locâi e ancje Paola Del Din, medaie di aur – e a son stadis scuviertis dôs targhis dedicadis ae memorie dai fradis Rinaldo e Luigi Dall’Armi, doi alpins che a àn dât lustri al otâf reziment dai alpins, muarts inte Vuere Grande e inte Seconde vuere mondiâl.
Cetante la int di Glemone che e à compagnât il corteu batint lis mans e berghelant “vive i alpins!”. (a.d.g.) – 07.04.2025
