Cjaldon african, sec, flums in sute e faldis che si sbassin. I Consorzis a cirin di parâsi e a fasin sù, soredut in culine, piçui bacins
No je di strassâ nancje une gote di aghe. Chest ritornel lu scoltìn di timp, a voltis sot vôs, altris berghelât, soredut cuant che, come chest an, o vin a ce fâ cul cjaldon african, pe tierce volte. Magari cussì no, al è un sec che al tache a dâ pinsîr, ancje parcè che la risierve di aghe che une volte e jere garantide de nêf e je simpri plui puare. Si clamin cambiaments climatics e ancje se cualchidun al conte che il cjalt al è simpri stât, la realtât e je chê che ducj o stin viodint, cul polvaron tai cjamps cuant che al passe un tratôr e cui arbui che a tachin a mostrâ segns di patiment. “No je di strassâ nancje une gote” al devente cussì no dome un ritornel, ma un dai adataments ai cambiaments climatics par no viodi lâ in malore la nestre agriculture. Alc al è stât fat in chescj agns par no strassâ, ma al somee ancjemò pôc a pet de cuantitât di aghe doprade ogni dì, che e rive dai flums cu lis presis che a puartin l’aur blu inte rêt dai canâi artificiâi o des faldis, che dut câs a son une vore sot de medie dal 2025 par vie de pocjis ploiis de Vierte, tant che il Consorzi di bonifiche dal Plan furlan al à dât l’alarme e al fevele di crisi idriche straordenarie, propit cumò che e covente plui aghe.
Daspò dai invistiments fats par doprâ mancul aghe tai cjamps (aromai la irigazion a scoriment e je cuasi dal dut sparide), o vin tacât a preparâ dai bacins artificiâi indulà tignî di cont la aghe pai moments plui dificii, soredut intes zonis indulà che no son implants che a supin de falde, dilunc des culinis innomenadis pal vin.
“Di cualchi an a van indenant i lavôrs par fâ bacins soredut intes zonis indulà che no si doprave aghe parcè che fin a cualchi an indaûr al ploveve une vore, si bagnave dome ogni tant e no son in vore implants di irigazion – e conferme Rosanna Clocchiatti, presidente dal Consorzi di bonifiche dal Plan furlan e de Anbi Fvg (Unione consorzi di bonifica del Fvg) -. O fevelìn di teritoris che no son struturâts e che no puedin bagnâ in nissun altri mût, di solit intes zonis culinârs e lis coltivazions a son specializadis. O fevelìn di bacins sot dai 100 mil metris cubis ben inserîts tal ambient che a doprin depressions za presintis tal teren o vecjis gjavis, come tal câs di Cuar di Rosacis. Chescj lâts piçui a conservin aghe di ploie, aghe cjapade di cualchi riul e in cierts câs ancje chê che e rive di cualchi poç, ma la volontât e je chê di doprâ, il plui pussibil, la aghe di ploie o che e je presinte a pêl di teren. Par di plui, i sistemis a saran di chei cu la irigazion a gote, che a sparagnin une vore di aghe”.
Cierts a son za in vore di cualchi an, cumò a son altris progjets ancje parcè che la nestre Regjon tal 2022 e je stade la prime in Italie a finanziâ cheste sorte di ativitât ancje par judâ lis ativitâts locâls e tal stes timp tutelâ l’ambient. O stin fasint ben lis robis ancje par no ruvinâ il paisaç, che in chescj teritoris al è pardabon impuartant e no si pues fâ pugns tal voli. Une vore di atenzion e je dade ancje ae sigurece parcè che a son implants pensâts dome par permeti la irigazion”.
Cheste la situazion presinte su la fonde dai dâts rivâts de Anbi Fvg: tal teritori dal Consorzi di bonifiche de Vignesie Julie a son in vore za cuatri bacins e altris cuatri a son in progjetazion, par un totâl di 181 mil metris cubis, ducj te zone culinâr orientâl o sul Cjars. Tal câs dal Consorzi di bonifiche Ciline Midune a son a disposizion, par bagnâ passe 25 mil etars, cinc bacins artificiâi grancj, alimentâts dai torints Ciline e Midune, par un totâl di 90 milions di metris cubis, ma si trate di bacins doprâts ancje par produsi energjie eletriche. Par finî, il Consorzi di bonifiche dal Plan furlan al à in progjet o al sta fasint sù (al è il câs di Vuelis di Manzan) cuatri bacins ducj inte zone culinâr a Est di Udin, par un totâl di cuasi 219 mil metris cubis. (a.d.g.) – 06.08.2026
