Vistîts Made in Italy falâts secuestrâts a Gurize

Cinc personis a son stadis denunziadis ae autoritât judiziarie di Gurize par ve comercializât vistîts marcats Made in Italy che però a jerin fats in Romanie. Chest il risultât di une lungje investigazion fate de Vuardi di finance di Gurize che e je rivade a ricostruî dute la filiere produtive ilecite, buine di meti in vendite sul marcjât talian e european cuasi 3 milions di toc stai ultins cinc agns.

Dut al è tacat di un control dongje dal confin suntun camion cun targhe rumene che al puartave 1.600 vistîts di femine, marcats come se fossin stâts fats in Italie, ma te realtât produsûts in  Romanie. (a.d.g.) – 03.11.2025