La cressite dai tas di interès e chê dal caric finanziarii si stan fasint sintî ancje pes parochiis de nestre regjon. Lis ratis dal mutui, se fatis cul tas variabil, a àn patît impenadis fuartis e a pesin sui belançs za curts dai ents religjôs che a son in dificoltât ancje inte racuelte des ufiertis par cause dal fat che simpri mancul int e va in glesie. A son daspò ancje parochiis che a àn fat invistiments par fâ cjasis su la mont pes vacancis e pe preiere dai grups dai zovins.
Par chest il Consei regjonâl al à aprovât tal Lui passât un emendament proponût dal conseîr Markus Maurmair par inviâ une procedure di jutori. Lis parochiis e i ents dal tierç setôr che a àn fat struturis su la mont par ativitâts ricreativis o di preiere a puedin domandâ un contribût ae Regjon par ridusi il debit fintremai al 80% di ce che al reste di paiâ, cuntun massim di 50 mil euros. Il sbassament dal debit al permetarà di ridusi cussì lis ratis di paiâ. (a.d.g.) – 10.09.2024
