Al sarà sucedût a plui di cualchidun di lâ a spas intun cualsisedi paîs dal Friûl e inacuarzisi che, soredut se si cjate tal centri storic, a son sieradis une vore di cjasis. E plui al è piçul il paîs o si cjate lontan dai centris plui grancj, piês e va. Se daspò o metìn dongje il fat che a restin viertis pocjis buteghis, alore o tachìn a vê un cuadri de situazion par nuie bon.
Cjasis vuedis, une vore dispès vecjis o fintremai malsiguris a stan deventant une rogne ancje pai sindics che, dispès, si cjatin cun imobii dilunc des stradis che a colin a tocs, indulà che si fâs fadie a cjatâ il proprietari parcè che si trate di int che e vîf tal forest e al tocje tirâ fûr beçons par meti dut in sigurece.
Su trops che a son i imobii vueits inte nestre regjon, ven a stâi chei che no son abitazion principâl, no son stâts afitâts cun contrats a tiermin lunc e a risultin a disposizion, i numars a cambiin un pôc a seconde de font, ma si fevele di un numar che al rive a 170 mil abitazions (a pet di passe 730 mil abitazions disponibilis) su la fonde dai dâts de Federazion taliane agjents imobiliârs professionâi (Fiaip), ven a stâi cuasi il 23%, une cjase su cuatri. Se di chest numar o tirìn vie lis cjasis fitadis cun tiermin curt (la maiorance intes localitâts turistichis o che a son dopradis tant che Bed&Breakfast), alore il numar al varès di jessi, secont de Union taliane dai piçui proprietaris (Uppi) ator des 100 mil unitâts. Simpri dai dâts de Fiaip si stime che lis cjasis vueidis e no dopradis a sedin a Gurize il 18,5%, a Udin il 14,4%, a Pordenon il 12,3%, a Triest il 17,5%.
Sul parcè di cheste situazion tant grivie lis analisis a son cetantis: par cui che al lavore te urbanistiche, tai agns passâts o vin fat sù masse e un pôc par dut, sparniçant cjasis sul teritori e condanant cussì i centris storics a une muart lente.
Par cui che al lavore invezit tal marcjât imobiliâr, il probleme al è leât a fîl dopli al Invier demografic, che al sta tamesant la nestre regjon, al cambiament de domande par vie di nuclis familiârs simpri plui piçui che a cirin lozaments no masse grancj e al fat che une vore di imobii no son stâts metûts a puest par vie dai coscj alts, cul risultât che a son stâts bandonâts dal dut.
“O vin a ce fâ cuntune situazion stranie: cundut che a son tantis cjasis vueidis – al vise Stefano Nursi, president regjonâl de Fiaip – la domande di imobii in afit e reste simpri une vore alte, ancje parcè che chel dai afits a timp curt al sta deventant un probleme. Nol è un câs che in cierts Comuns talians, indulà che la situazion e stave deventant simpri plui grivie, lis cjasis bandonadis a son stadis dadis ai Comuns par metilis in ordin e fâ tornâ dentri int in graciis di agjevolazions. Al è ancje il probleme che, intai ultins agns, par vie de pôre di fitâ a int sbaliade, o dal probleme dai coscj simpri plui alts pe ristruturazion o par meti a norme lis abitazions, une vore di proprietaris a àn vût miôr lassâ vueide la cjase magari vude in ereditât. Par fortune cumò lis robis a stan cambiant e cuant che si trate di int che no paie l’afit, no feveli di chei che a son in dificoltât, ma di chei che lu fasin a pueste, lis proceduris par liberâ l’imobil a son deventadis plui sveltis. Al reste il fat che la int cumò e domande cjasis plui piçulis, cun mancul cjamaris e che a consumin pôc”.
Ancje lis politichis de Regjon, che e à metût a disposizion desenis di milions di euros par dâ une man ai proprietaris, a varessin di dâ un jutori impuartant. Pôc timp indaûr a son stâts publicâts trê bants a pro de ricualificazion energjetiche, de metude in sigurece e dal recupar funzionâl dal imobil, par fâ tornâ a vivi int dentri des cjasis vueidis cuntun contrat di fit agjevolât. L’assessôr regjonâl aes Infrastruturis e al Teritori Cristina Amirante, dilunc di une cunvigne fate a Gurize ai 28 di Lui, tal ilustrâ i contignûts des plui impuartantis iniziativis legjislativis, tacant dal Ddl 90 sul guvier dal teritori, che al è in discussion tal Consei regjonâl, e à sotlineât che “La Regjon e sta cambiant il mût di fâ politiche pe cjase: no si limitìn a finanziâ intervents, ma o stin fasint sù struments normatîfs par fâ deventâ pussibile la rigjenerazion urbane e tornâ a meti sul marcjât miârs di cjasis vuê no dopradis”. (a.d.g.) – 06.08.2026
